Активност од проектот „Промо турнеја – Тумба Маџари

На ден 2.3.2026 година, нашето училиште беше домаќин на проектот „Промо турнеја – Тумба Маџари во основните училишта во Македонија“, кој се реализира со претходно дадена согласност при аплицирањето во Министерството за култура и туризам.

Овој значаен проект се спроведува во соработка со Археолошкиот музеј на Македонија и археолошкиот локалитет Тумба Маџари, со цел кај учениците да се подигне свеста за значењето на културното и археолошкото наследство на нашата земја.

Во рамки на активноста, учениците имаа можност да проследат презентација и филмска проекција посветени на локалитетот Тумба Маџари, да се запознаат со неговото историско и културно значење, како и одблиску да ја видат и запознаат Големата мајка божица – препознатлив симбол на Тумба Маџари и Скопје.

Како дел од оваа едукативна средба, на учениците им беа поделени флаери, стикери и постери, со што дополнително се збогати нивното искуство и интерес за археологијата и културното наследство.

Ваквите активности се особено значајни затоа што овозможуваат учениците на интересен, визуелен и непосреден начин да учат, истражуваат и градат почит кон богатото историско минато на нашата држава.

Им благодариме на организаторите и соработниците за успешната реализација на оваа содржинска и инспиративна активност.