Учество на Европската конференција „Skills for Future – Schools for Future“

Во периодот од 27 до 29 април 2026 година, претставник од нашето училиште зеде учество на Европската конференција „Skills for Future – Schools for Future“, која се одржа во Франкфурт на Мајна, Германија, со поддршка на Националната агенција за европски образовни програми и мобилност.

Конференцијата беше посветена на развојот на училиштата ориентирани кон иднината, со посебен акцент на вештините за иднината, дигиталното образование, вештачката интелигенција, инклузијата, одржливиот развој, демократските компетенции, Erasmus+ и eTwinning соработката.

Особено значајно за нашето училиште беше тоа што имавме можност пред претставници на други европски училишта да ги презентираме досегашните реализирани проекти и успешни практики од повеќе програми, со посебен акцент на програмата Erasmus+. На тој начин го промовиравме нашето училиште, ја потврдивме вредноста на досегашната работа и отворивме можности за воспоставување нови партнерства со училишта од различни европски земји.

Учеството на оваа конференција овозможи размена на искуства со наставници, училишта и образовни професионалци од повеќе европски земји, како и стекнување нови идеи за унапредување на наставата, развој на меѓународната соработка и поквалитетна поддршка на учениците.

Новите контакти, искуства и идеи претставуваат силна мотивација за понатамошен развој на нашето училиште како современа, отворена и европски ориентирана образовна институција.