Настан „Trash Fashion Runway – Circular Economy in Practice
16/06/2026
Посета на Кабинетот на претседателката Гордана Сиљановска-Давкова
16/06/2026
НАСТАВА ВО ПРИРОДА – УЧЕЊЕ НИЗ ИСКУСТВО, ПРИРОДА И КУЛТУРА 
Учениците од V одделение од ООУ „Илинден“ – Крива Паланка, од централното училиште и подрачното училиште во с. Конопница, во периодот од 3 до 5 јуни 2026 година ја реализираа програмата „Настава во природа“ во Охрид, Струга и нивната околина.
Ова тридневно патување беше вистинска можност учениците да учат надвор од училницата, преку непосредно набљудување, истражување, дружење и посета на значајни природни, културни, историски и духовни локалитети.
Првиот ден, на пат кон Охрид, учениците го посетија Вруток – изворот на реката Вардар. Таму имаа можност да се запознаат со значењето на изворите, природните богатства и географските карактеристики на овој значаен предел. Преку оваа посета учениците на непосреден начин ја согледаа важноста на водата како природно богатство и значењето на реката Вардар за нашата држава.По пристигнувањето во Охрид следуваше сместување, одмор, дружење и подготовка за богатата едукативна програма што ги очекуваше наредниот ден.
Вториот ден учениците го започнаа со посета на Наколната населба – Музеј на вода, позната како „Залив на коските“. Од страна на кустосот учениците се запознаа со начинот на живот на луѓето во праисторијата, со изгледот на наколните живеалишта, секојдневните активности, алатките и предметите што се користеле во минатото. Оваа посета беше вистински час по историја, археологија и култура на отворено.
Потоа беше посетен манастирскиот комплекс „Св. Наум“, еден од најубавите и најзначајни духовни и природни локалитети во Македонија. Учениците се запознаа со значењето на манастирот, со духовното наследство на Св. Наум, како и со природните извори кои ја прават оваа локација посебна и препознатлива. Во рамки на посетата учениците имаа можност да ги видат природните убавини покрај Охридското Езеро и да разговараат за значењето на заштитата на природата, езерото, изворите и културното наследство.
Во попладневните часови следуваше посета на стариот дел на градот Охрид, каде учениците прошетаа низ тесните охридски улички и се запознаа со богатата историја на градот.На Античкиот амфитеатар учениците дознаа дека Охрид уште од античко време бил важен културен и градски центар, каде се одржувале јавни настани и собири.
На Плаошник, преку поучните информации од страна на кустосот, учениците се запознаа со големото значење на ова место за македонската и словенската писменост, со делото на Св. Климент Охридски, со црквата посветена на Св. Климент и Св. Пантелејмон, како и со значењето на Плаошник како духовен, просветителски и културен центар.
Посетата на црквата „Св. Јован Богослов – Канео“ беше посебно доживување за учениците. Тие имаа можност да ја видат една од најпрепознатливите охридски знаменитости, сместена на карпата над езерото, и да ја почувствуваат убавината на спојот меѓу природата, архитектурата и духовното наследство.
Во црквата „Св. Софија“ учениците се запознаа со значењето на овој храм како еден од најважните споменици на средновековната уметност и духовност во Охрид.
Посетата на Самоиловата тврдина им овозможи на учениците да се запознаат со историското значење на тврдината, нејзината одбранбена улога и погледот кон Охрид и Охридското Езеро, кој ја доловува убавината и значењето на овој град низ вековите.
Учениците имаа можност да ги посетат и Биљанините извори, место поврзано со природните убавини и народната традиција на Охрид.
Прошетката низ старата охридска чаршија и покрај брегот на Охридското Езеро беше можност за набљудување, разговор, дружење и создавање убави спомени. Учениците уживаа во убавините на градот, во езерскиот пејзаж и во културниот амбиент што го прави Охрид посебен.
Во попладневните часови беа реализирани работилници и активности поврзани со сложувалката „Парче по парче – Street Smart Flagbag сложувалка“. Преку оваа активност учениците развиваа тимска работа, соработка, логичко размислување, креативност и вештини за решавање проблеми. Работилниците беа можност за учење преку игра, комуникација и заедничко создавање.
Последниот ден учениците уживаа во убавините на Струга – градот на поезијата. При прошетката низ градот тие се запознаа со Мостот на поезијата, со брегот на Охридското Езеро и со истекот на реката Црн Дрим од езерото. Учениците имаа можност да ја согледаат убавината на Струга како град во кој природата, поезијата и културата се испреплетуваат на посебен начин.
Посебен впечаток остави посетата на Спомен-куќата на браќата Миладиновци. Токму таму, на место исполнето со културно и литературно значење, учениците ја рецитираа песната „Т’га за југ“, со што на достоинствен и емотивен начин ја почувствуваа вредноста на македонската литература, јазик и културна традиција.Наставата во природа беше многу повеќе од патување. Таа беше учење преку искуство, дружење, истражување, почитување на природата, запознавање со културното наследство и развивање на љубов кон татковината.
Учениците се вратија побогати со нови знаења, убави спомени, нови искуства и вредни животни лекции. 
